[短評] 競爭愈大,節目質素愈差

posted in: 政治, 社會 | 0

//現時有電視節目以藝人受苦吃大量日本芥辣作招徠,認為電視行業競爭愈大,電視台往往為了吸引觀眾,或會製作出位或暴力等質素差的節目,並不符合公眾利益。// 按呢個邏輯,應該唔發新牌,兼沒收埋無線個牌,俾亞視一個台做晒,冇晒競爭,播多啲感動香港呢啲咁有質素嘅節目,令食wasabi嘅低俗節目絕跡,絕對符合公眾利益。  

無線新聞雞汁式政改報導

posted in: 政治 | 0

無線報導譚志源派單張宣傳政改(報導連結),無線剪出嚟播嘅兩個「途人」--一個阿婆話反對普選,另一個男人就話反對公民提名。 個阿婆可能未受過教育同俾土共洗咗腦,唔怪得佢,但係個男人就真係過癮。佢先話反對公民提名,因為唔可以選出個特首同中央對抗。跟住有記者問佢有咩擔心,佢爆出一句話擔心有候選人因為篩選而不能入圍,嗰啲候選人可能都係為香港嘅咁。 呢樣嘢本身都已經夠矛盾,你反對公民提名係因為唔想有同中央對抗嘅人入圍,咁咪即係篩選囉,但更奇嘅係跟住譚志源講咗一大輪話係公平競爭,唔會有篩選。記者再問嗰個男人擔唔擔心有篩選,佢就話唔擔心,因為局長保證唔會(圖1)。局長保證唔會就唔會架喇?你做咗幾多日人? 成件事睇到人眼火爆嘅地方有二。第一,呢個男人真係好可悲。如果佢係做媒,佢就係一個唔及格嘅媒。如果佢唔係,佢前後矛盾同天真嘅程度,真係好值得人同情。當然,我地要尊重唔同人嘅政見,我只係同情佢咁易俾人呃。 第二點先係重點--無線新聞,根本唔係是是旦旦,而係河蟹過人,做個咁嘅報導根本就係政改雞汁節目。堂堂一個大台,做個新聞好做到好似強國有電視台報導「記者採訪『偶遇』書記乘地鐵」(圖2)咁,一樣虛假,一樣荒謬。無線呢個報導出嚟個效果就係女長毛好嘈咁反對譚志源、有個阿婆反對普選、有個男人信譚志源客氣嘅官話所以釋除疑慮。成個故仔真係和諧到冇得頂。 (CCTVB截圖: 連結) (強國記者採訪「偶遇」書記乘地鐵截圖)

電視作為維穩洗腦工具: They Live (港譯《極度空間》)

posted in: 政治, 社會, 通識 | 0

講電視嘅反烏托邦電影之中,”They Live”(港譯:極度空間)係一套經典。裡面講美國俾外星人控制咗電視、廣告、報紙,不斷向人類洗腦,要佢地服從、消費、娛樂、接受社會不平等。而家睇番,似乎係講緊香港多啲。咩人係外星人?你話呢? 片段:http://www.youtube.com/watch?v=9qE-sgI3i-M

《東張西望》比ATV焦點更醜惡

posted in: 政治 | 0

[先前一肚子氣寫了一篇口語文章罵CCTVB,這是語體文版] 《東張西望》變身CCTVB版《ATV焦點》,替689政府的「六頁紙」解畫護航,兩位主持「撚起把聲」(撚乃古字,指提舉,不是粗口),理直氣壯地狂踩HKTV,拿著政府的歪理逐條以引導性手法粉飾,還特別提醒觀眾申請電視牌照條款列明,行會不發牌其實不須提供理由──潛台詞即是告訴各位刁民,給你們六頁紙是人情,不給你們是道理。 這還不夠,兩位TVB李春姬臨尾還要繼續撚住把聲警告你們這班香港人不應該攻擊個別電視台和主持人,還說他們其實「與世無爭」。很明顯他們是要為雞汁May出一口氣,不過這一集一出,似乎會被攻擊的主持會包括埋她們自己了。主持還提醒大家理性一點,不要被人煽動包圍立法會。政府發牌三變二,最高興的當然是CCTVB,現在全城忿怒,偏要在這時候這樣攞彩──他們先在《東張西望》幸災樂禍地「邀請」藝人回巢,現在更加化身ATV焦點教訓香港人,其賤格程度足以為電視史寫下新的一頁。CCTVB的賤格表現,更加證明引入競爭的重要性。 這一集《東張西望》歪理連篇,其中一個例子是他們替政府解畫時用了以下的統計圖,想引導觀眾覺得NOW和Cable這兩個收費電視台的收視率,比HKTV前身香港寬頻的BBTV好得多,以證明政府三揀二的話,應該揀NOW和Cable兩個台。其實只要稍為用腦也想得到,根本HKTV和BBTV是兩回事,前者是有完整計畫和大量初期投資的免費電視台,後者只是香港寬頻的附加服務,兩者不能混為一談。以無線的邏輯,根據1966年的收視率,理論上麗的呼聲比無線更適合經營無線廣播。 (圖片載於kurskhk.net Facebook Page) 說到底,這兩天大家狂插《東張西望》,投訴數字過二萬又如何? 《東張西望》的觀眾群其實就是已經被CCTVB洗腦的一群,他們肯定不像大家一般清醒,CCTVB講什麼歪理也會照單全收。《東張西望》恐怖的地方,是他們不用跟從專業新聞做法,長期散播一種娛樂化和愚民化的社會觀,他們先是抹黑碼頭工人,現在變本加厲做出如此無恥的一集,證明他們已經沒有底線。在可見的將來,這種維穩做法只會愈來愈常見。第一段說東張西望是ATV焦點其實不正確,因為它比ATV焦點危險一千倍。 人無恥就無敵,電視台無恥就更無敵,因為它掌握了影響社會上懶於思考者的思想。CCTVB親自示範了在無競爭之下的電視市場可以有多臭多爛,也親自示範了一個電視台仆到去做政府喉舌的嘴臉可以有多核突。   連結: 投訴《東張西望》違反《電視通用業務守則》   後話:有人說兩個主持穿深色衫,可能是暗地裡反抗。唔好玩啦,你看她倆的嘴臉和語氣,何來反抗?還有,你看那個朱凱婷的上衫中間是有個大窿的。反抗?似做台慶多啲!我不是要物化女性身體,不過我真的未見過有人這樣表達沉重心情的。

《東張西望》仲衰過ATV焦點

posted in: 政治 | 0

(不好意思,昨晚寫這段文字的時候氣上心頭,用了口語,而且用字頗粗俗,請見諒)   《東張西望》變身《ATV觀點》,幫689解畫護航,嗰兩個主持撚起把死人聲(粵語字,指提舉,不是粗口),理直氣壯咁狂踩HKTV,幫政府啲歪理逐條以引導性嘅手法粉飾,仲講話條款列明行會唔發牌唔駛俾理由咁。 咁仲未夠,嗰兩個李春姬臨尾仲要繼續撚住把聲話你地班香港人唔應該攻擊個別電視台同主持人,話佢地其實係「與世無爭」。佢地好明顯係講緊雞汁may,不過而家似乎要包括埋佢地自己喇。仲有呀,佢地話叫大家理性啲呀,唔好俾人煽動包圍立法會呀。咁都仲要攞彩,真係好賤格。更加證明咗競爭係必須。 BTW, 有人話主持人著深色衫,可能係暗地裡反抗。唔好玩啦,你睇佢兩個啲咀臉,何來反抗?仲有,你睇嗰個朱凱婷件衫中間有個大窿架,反抗?似做台慶多啲! 講開呢集《東張西望》嘅歪理,其中一個就係佢地幫政府解畫時整張咁嘅圖出嚟,想引導觀眾覺得NOW同Cable本來收視好過HKTV前身BBTV好多,證明三揀二都應該揀呢兩個台。健吾已經cap圖指出呢啲叫偷換概念,根本HKTV同BBTV嘅收視係兩回事,唔可以混為一談。以無線嘅邏輯,理論上麗的呼聲係比無線更適合做無線廣播。(左邊張cap圖借自健吾) (圖片載於kurskhk.net Facebook Page) 講到尾大家插爆「東張西望」,但平時睇開嘅觀眾其實就係俾CCTVB洗咗腦嘅一群,佢地肯定冇大家咁清醒,結果都係照單全收。東張西望恐怖嘅地方,係佢唔跟專業新聞做法,長期傳播一種娛樂化同愚民化嘅社會觀,之前就抹黑碼頭工人,而家變本加厲做得出咁無恥嘅一集,證明佢地已經冇底線,響可見將來,呢種維穩做法只會愈來愈多。話東張西望係ATV焦點其實唔正確,因為佢比ATV焦點危險一千倍。 都係嗰句,人無恥就無敵,電視台無恥就更無敵。CCTVB親自示範咗無競爭之下嘅電視市場可以有幾爛,亦都親自示範咗一個電視台仆到去做政府喉舌嘅咀臉可以有幾核突。 連結: 投訴《東張西望》違反《電視通用業務守則》

關於雞汁革命的幾點誤解

posted in: 政治, 生活, 社會 | 0

政府發牌拖足三年,結果牌照三變二,王維基的HKTV出局,香港群情洶湧,媽聲四起,支持發牌予HKTV的FB Page在短短兩日內有40萬人Like,都算係一個紀錄。發牌事件,令唔少人諗番起冇競爭之下嘅無線不停落雞汁嘅爛節目,討論過程中,往往用雞汁嚟形容現在觀眾被迫睇爛節目嘅仇怨,仲話星期日要去圍政總,為咗做標題黨,我姑且叫呢場風波做雞汁革命(當然係有啲誇張)。 其實呢場雞汁革命,有幾點旁觀者可能有所誤解,以為呢個只係這業事件,以為啲人而家突然變咗王維基fans云云,而實情係: 1. 呢件事唔係商業事件,而係政治事件--政府先引導人投資成十億八億申請牌照同起電視製作大樓,拖咗人幾年之後話唔批,一鋪玩死人。 2. 呢件事唔只係政治事件,而且係公共行政失當事件--你政府行使專斷權力(arbitrary power)時出爾反爾,又唔肯提供令人信服嘅理由。單係呢樣嘢已經可以申請司法覆核,但政府有嘅係時間同錢,司法成本都夠玩死你。 3. 而家冇人話王維基係聖人(佢都要同政府&西環談判),冇人話HKTV啲劇一定好睇,而家大家唔係突然變晒王維基fans,大家唔滿意係政府嘅處事手法態度,同埋程序上唔公道。 4. 冇人話HKTV有牌之後,香港電視市場會冇晒雞汁、冇晒無線公式,突然個電視圈出到半沢直樹 x Change x 唐頓莊園,但至少都應該俾觀眾多啲選擇,令個行業多啲競爭。 5. 亞視已經垃圾到無極限,感動香港無限loop、開住個微博當節目、ATV觀點口音唔正講極左歪理,我地真係忍夠。應死嘅唔死,有心做嘅就俾你政府玩死。大家係條氣唔順呀。 6. 你地爭取發多個牌,你地咪一樣網上睇半沢直樹/Running Man/康熙來了、你地咪一樣會睇TVB雞汁偷聽煮麵綁票。喂,大佬呀,七孔流血還七孔流血,死還死呀,要求引入競爭、反對政府處事不公,同我睇唔睇電視係兩回事。 (圖片:FB Page)

如果無線拍港版半沢直樹

posted in: 生活 | 0

如果無線拍港版半沢直樹,應該會: 1. 變40集長劇 2. 平均每兩集偷聽到秘密一次 3. 不斷打邊爐/BBQ 4. 同一家銀行內不斷出現三角戀同換伴 5. 壇蜜個角色會不斷露肉 6. 一定會有警察角色,而且好大機會發生綁架同脅持人質案 7. 一定三代同堂 8. 半沢一定會有細佬妹,而且一定同半沢間銀行職員拍拖 9. 一定有鄭子誠負責其中一個陰謀 10. 半沢花一定會以「煮個麵俾你食」安慰半沢直樹