單車、馬路、我

posted in: 生活 | 0

自從女兒出世之後,在危險路段踩車的勇氣少了,以前是能夠在貨櫃車出出入入的貨櫃碼頭和新界北路段踩,或者是在搵食車下下攞命的太子道或者英皇道踩,又或者是在年年出致命意外的大嶼山北踩。

不知所謂的荷蘭單車路權X

posted in: 城市景觀 | 0

睇呢條片真係愈睇愈覺得啲荷蘭人不知所謂。社會進步,當然就係愈來愈汽車,汽車車主先至係馬路真正馬路主人,單車係偷條路嚟用架,車死佢地係佢地嘅問題囉。最好成條馬路都唔俾單車行,大家乖乖地等多班地鐵咪好囉。因為交通愈來愈繁忙,一年有4百幾個兒童踩單車被撞死,最有效率嘅處理方法當然係禁晒啲單車佢啦,佢地係都要踩,撞死與人無尤架,啲人點解仲要出嚟抗議,將啲單車瞓晒響路中心示威爭取成個城市都整單車徑?下下都抗議,個社會好亂囉。 仲有呀,點解荷蘭啲單車徑設計得咁差架?佢地竟然唔駛每一百幾十米就整啲路障要單車車主停低推車,咁啲行人點行得過呀?你當啲行人一定有眼識睇有冇單車架?佢地應該整多啲路障位,響啲冇行人行嘅位交通警可以埋伏抄牌吖嘛。荷蘭真係好落後囉。 條片(可以揀中或英文字幕):https://www.youtube.com/watch?v=XuBdf9jYj7o#t=335

單車嘅嘢,唔該唔好對住記者亂講

posted in: 城市景觀, 生活 | 0

//業餘單車會「講隊」會長郭志堅則指,本港單車徑容許其他用途使用,如跑步、散步、溜狗、小朋友學單車等,當假日單車量多時,易生意外,加上單車徑有速度限制,令真正單車發燒友無興趣使用,認為增設市區單車徑對推動單車運動無幫助。// [報導原文連結] 如果係記者誤報,郭志堅應該澄清。如果不是誤報,那就真的匪夷所思了。 第一,香港單車徑容許跑步、散步、溜狗的嗎? 香港法例有寫: 第374G章 – 《道路交通(交通管制)規例》 38 行人徑及單車路 本標誌顯示一條毗連的單車路及行人徑,而該單車路只供騎單車者使用,該行人徑則只供行人使用。 第二,當差不多整個單車社群都在爭取市區增設單車徑/單車行車線的時候,他竟然說「增設市區單車徑對推動單車運動無幫助」?他心目中只有奧運單車場地可以推動單車運動嗎?  

又有人提議翔東路禁單車

posted in: 城市景觀, 社會 | 0

聽聞又有人建議話大嶼山翔東路要禁單車。其實即係咁,翔東路最近兩次致命交通意外,都唔係單車車主嘅錯,而係對面架大車錯。成件事其實可以咁睇: 1. 翔東路根本就唔危險,佢比較「危險」嘅地方係 (i)不時有大旅遊巴, (ii)條路又長又風平浪靜,好易令人降低警覺性。但咁唔係禁單車嘅理由,如果翔東路要禁單車,咁唔該全香港馬路禁晒佢。而家單車駕駛者出事,係汽車司機嘅錯,點解唔係從汽車駕駛安全著手? 2. 長遠計,翔東路絕對有條件起單車徑,如果政府咁做,我乜都舉晒咁贊成。響呢樣嘢做到之前,唔係應該禁單車,而係提醒單車駕駛者有咩要小心(例如唔好聽耳筒呀大佬),同埋提醒大車小心細車(而家都有路牌,不過可以多啲)。 3. 真正比較要留意嘅地方,其實係欣澳道。假日有唔少明顯冇踩馬路經驗嘅人由欣澳道踩入迪欣湖,呢條路其實好闊又好少車,暫時都唔算難踩。但係因為條路又要上斜落斜,個規格又似高速公路,而且有大迴旋處,所以唔係人人適合踩。不過,咁都唔係禁單車嘅理由。而係應該有告示建議人小心,無經驗者唔好入。 通常講呢啲都會有好多反對單車路權嘅朋友反對,不過大家可以理性討論。