人喜歡活在童話之中

posted in: 政治 | 0

15380485_10154196137185857_1747985244235305169_n

有睇The Walking Dead嘅朋友會識得King Ezekiel (以西結王)。佢建立咗個君權神授嘅社區,個社會好似個教會福音營咁,啲人神神化化咁,好似做古裝片咁對以西結國王臣服。

The Walking Dead裡面出現過唔同嘅部落,每個部落其實都面對緊同一個問題--就係點樣團結內部應付外來挑戰。因為文明已經崩潰,其他部落同喪屍出現,好容易威脅佢地生存,但內部一旦出現不穩,就未俾人殺就先內鬥死先。

呢啲部落維持內部穩定嘅方法,大概係呢幾種:
– 宗族關係(Maggie個家族、Terminus核心嗰班人好似係)
– 最好打同最有魅力嘅人做大佬(主角Rick團隊)
– 民主選舉大佬(Alexandria社區、監獄時期嘅主角團隊)
– 運用文明崩潰前嘅體制權威(成班警察管理嗰個團隊、軍佬遇到主角之前個小團隊)
– 手段最恐怖嘅做大佬(Governor算一半、Negan)

最得意嘅大概以西結王個社區, 基本上佢地作回復番中世紀咁去結合宗教、傳說、禮儀去維持一個神授君權。以西結王自己講, 其實佢只係誤打誤撞變成咗傳說中嘅英雄, 啲人需要搵對象去追隨, 咁佢就應呢啲人嘅需要扮鬼扮馬, 扮到上帝使者咁, 啲人好樂於咁樣, 因為有安全感, 但係呢個咁大愛和諧嘅社區, 原來一直係被半殖民統治, 要定期納貢俾Negan,不過國王唔俾大部份子民知道, 因為佢需要佢地活響個和諧社區嘅童話世界之中,專心生產嚟納貢。

其實呢啲部落, 就係人類文明演變嘅縮影。人係群居動物, 天性就係需要安全感, 為咗安全感, 會順服於社會規範同神話當中,啲人會好樂意活響童話之中,佢地只需要一個感覺OK嘅代理人去維持童話運作。

講到呢度,個故事似乎有啲熟面口。

Leave a Reply