睇完Rogue One你可能會問 – 點解啲反抗軍部隊咁容易彈出彈入?

posted in: 電影 | 0

彈出彈入,呢個本來就係Star Wars Universe嘅設定,小至一架戰機(負責送死嘅TIE Fighter例外),大至成個死亡星都可以穿越hyperspace隨時走去另一個星球,所以啲反抗軍至可以打極都死唔晒,可以隨時hit and run。

Star Wars Universe 嘅戰爭模式,大致上就係要肉眼見到嘅先射到,冇得射追蹤導彈,所以戰機對戰機就要好似二戰空戰咁dogfight (遲過Star Wars出現嘅Gundam系列,設定都係咁,佢地創作咗「米諾夫斯基粒子干擾」呢個解釋),戰艦之間就係直接炮戰互射同用戰機放「魚雷」炸對方。戰艦就有保護罩,俾人射到扣晒能源就冇罩。為咗防止敵艦彈出彈入逃走,佢地有一種魚雷,係可以令艦隻失去動力,而大嘅艦艇可以用牽引光束捉住敵艦唔俾對方走甩。

啲星球嘅保護罩,理論上係好貴嘅設施,只可以響重點星球佈置,所以反抗軍好易彈出彈入偷襲到帝國軍。

帝國軍嘅戰略,基本上就係以量取勝,尋求主力決戰嘅機會。佢係帝國你唔係,佢可以不斷生產戰力一般嘅TIE Fighter 同白兵,唔怕你偷襲,唔怕白兵命中率低,總之就係不斷生產,於是成個Galaxy周圍都係佢地嘅人。

而反抗軍因為係反抗軍,要四圍匿埋,生產力好有限,所以佢地好怕主力俾帝國軍捕捉到主力(名句meme:"It’s a trap"),因為俾帝國捉到主力艦隊圍住,就好難再建立,反抗軍本身都只係一個聯盟,一旦打輸,好多勢力就會走人。

咁帝國軍點搵啲彈出彈入嘅反抗軍?佢地主要係靠啲無人機去唔同星球搵,加埋啲線人俾料。但因為個Galaxy 太大,而且帝國本身係一個人類法西斯政權(而且係白種男人至上嗰種)恐怖統治,所以其他種族唔鍾意佢地,情報工作就更難做,搵極都搵唔到反抗軍主力或者領袖人物。

配圖係一隻叫”Star Wars Rebellion”嘅超舊戰略game,佢大約就係跟住Star Wars Universe 嘅法則模擬戰略推演,好襟玩的。啲戰爭嘅法則到而家Rogue One 都係一樣。

Comments

comments

Leave a Reply