紅白機復刻版開箱文

posted in: 生活 | 0

細個嘅時候覺得紅白機係世界上最好玩嘅嘢,當時屋企冇,只能夠去老豆個朋友屋企打機,我一直想像大個咗之後要買番一部,結果三十年後佢真係出復刻版,基本上我就係一句shut up and take my money。可以買番三十年前最想要嘅嘢,此刻無價。

年三十嘅時候我去啲舖頭比較過正版同山寨版(其實我覺得比較已經係唔啱),山寨版號稱多啲game,但仔細比較,就會發現山寨版啲game絕大部分都係廢game,最經典嗰啲都冇。正版雖然得40隻game,但基本上都係經典game,例如惡魔城、薩爾達傳說、洛克人、魔界村 、FF1(可惜冇1943)。

等阿女瞓咗,終於可以開箱。一開機,細個借機打嘅感覺番晒嚟,但係個畫面「改良咗」,感覺係高清輸出嘅8-bit,太清了,唔夠raw。早陣子我借過紅白黃線輸出嘅山寨版大紅白機嚟玩,個畫面核突好多,嗰種先至係真正紅白機畫面。(多得大家提醒,原來設定有得較核突mode–個畫面有瑕疵、會跳跳下先至係王道!)

有咗部紅白機,可以同太太一齊雙打,唔駛單打,實在係小確幸。

部機最美中不足之處,係個手制太細,我想要番細個嗰種手感呀… 喜劇之王龍哥:「我要初戀呀!」

Comments

comments

Leave a Reply