教育 親子

目送那一天你們會飛

班學生Speech Day。對住佢地三年,同我對住阿女嘅時間一樣,所以對佢地有一份特別嘅感情。自由而過癮的大專生活即將來臨希望佢地都入到想入嘅地方,做想做而有意義嘅嘢,唔好浪費呢幾年。

今年第一次有大合唱答謝父母環節。我諗呢個場面,佢地當然會一世記得,而佢地嘅父母應該更深刻。後來,choir唱《那一天我們會飛》,呢首歌我上網聽覺得冇咩感覺,但聽班choir唱,又幾令人有感觸,或者係因為context唔同吧。《那一天我們會飛》套戲其實係講70後長大咗活得不知所謂(當堂感懷身世),不過再不知所謂,中學應該都有過快樂嘅日子,有過夢想。唔知70後嘅少年夢想同而家嘅特區後出世嘅有咩分別?

Speech Day結束,我基本上是脫了水。離開學校時已經九點幾,我去咗附近食雲吞炸醬麵,叫支凍嘢一口氣飲晒。

雖然未到夜涼如水,但夜晚呢個海邊舊區的確幾舒服。同一時間,班學生應該去咗食宵夜同搵地方傾計。做教習用渣古的,其實係不斷目送學生離開,能夠響佢人生裡面出現過幾年,希望對佢嚟講係一個美好回憶,咁已經好好。

再諗落去,學生做中文SBA睇《目送》,本來係講父母對子女,就係一場目送。早排去阿女間幼稚園嘅入學家長會,乖乖地坐響度聽個校長講嘢,因為自己做呢行,所以感覺總係怪怪地。不過,成個家長會我有個感覺,就係家長通常都只能夠相信學校能夠令到個小朋友學到嘢/全人發展/美好回憶 etc。呢種期望,教書先生應該係好似白帝城托孤咁重視

講番目送,其實學生就冇得唔捨得,畢竟徒弟下山係永恆定律,唔通你想佢下唔到山咩,我成日同佢地講,你add 我FB 或者 Whatsapp,我見到你放閃、旅行、exchange、OCamp、畢業、passing out、搬屋、結婚、生仔,咁我就會鄧你開心。

不過,對自己嘅小朋友,目送嘅過程就好唔同。佢日日都有新嘢,愈來愈多需要自主嘅地方,本來嚷著要同你一齊玩嘅嘢,到聽日可能佢唔想你一齊玩,要學習放手,不容易。

13466289_10153767600370857_740080836660880114_n

Leave a Reply

Your email address will not be published. Required fields are marked *

Powered by: Wordpress